【未出發先興奮】
買好機票，開始認真咁plan下冰島點玩好，一早已經有心理準備冰島呢個trip會好貴，但都想盡量慳得幾多得幾多，充分發揮師奶仔性格。因為唔想join團，想自駕多啲彈性，所以租車就一定走唔甩！
冰島有好多租車公司，雖然都有格價網，但始終都唔可以格晒所有所有租車網站，同埋記住要小心睇清楚保險條款，租得平但如果保險貴或者好多嘢都唔包，到時如果架車花咗或者有咩意外就得不償失啦，所以最後都係親自去左以下咁多個網站嚟做呢個大比拼！一般預先係網站預約租車價錢點都會比到步後先租平，所以可以嘅話就記住一早租定啦！
由於我只係同男朋友2個人去，所以唔需要一架太大嘅車，亦都唔想租campervan，因為驚訓得唔好又要成日揸車好危險，所以呢次比較係無包括只租campervan嘅公司。而且冰島真係有好多租車公司，所以真係唔可能列晒所有公司出嚟，但希望呢個評比都可以幫到大家啦！
【租車要求】
- 最平又可以預訂嘅4×4 (始終都唔係諗住淨係喺Reykjavik附近玩下就算，安全起見都係租架穩陣啲嘅4×4。另外，選擇車輛嘅時候記住考慮會帶幾多行李，行李太多嘅話車尾箱放唔晒又人多嘅話可能會坐得耐唔舒服。)
- 手動 (手動慳油，而且一般都平啲)
- 柴油 (盡可能，油價平啲)
- 凱夫拉維克國際機場(Keflavik International Airport)拎車同還車
- 盡可能括所有保險而且無墊底費/自付額(即係萬一有咩事，無需先俾一筆錢。冰島地勢咁大自然，天氣又唔穩定，出事率好高 － 架車會花，碎石整爛玻璃，車門損毀等。)
- 無限里數
- 唔額外要求GPS
【租車日期時間】 2 June 2017 2300 至 9 June 2017 2200 (7日)
【保險簡介】根據個人認知，並非專業意見 #頭盔mode
- CDW – Collision Damage Waiver 碰撞險 (一般租車已包，但墊底費/自付額較高)
- SCDW – Super Collision Damage Waiver 升級碰撞險 (墊底費/自付額較低甚至為零)
- SAAP – Sand and Ash Protection 沙塵險 (冰島有時候會有沙塵暴，如果因為沙塵暴而令車輛造成損壞，保險可以賠償。可能有墊底費/自付額，按不同公司而定。)
- GP/WP – Gravel Protection/Windshield Protection 礫石保險 (因為碎石造成車輛的損壞而賠償，如擋風玻璃。可能有墊底費/自付額，按不同公司而定。)
- TP – Theft Protection Insurance Package 竊盜險
- TPI – Third Party Insurance/Liability 第三方責任保險 (法例規定，租車已包)
- PAI – Personal Accident Insurance 個人險 (法例規定，租車已包)
【評比日期】19 March 2017
*兌換為歐元 (兌換率為1 ISK : 0.0845169 EUR 或 1 EUR : 118.320 ISK)
**價錢後面有括號就係墊底費/自付額
【最後決定】
最後我哋係喺”Lotus Car Rental”租，價錢算係幾平，另一間”Iceland 4×4 Car Rental”都差唔多價錢，好似仲話可以一啲墊底費/自付額都無，但係Trip Advisor好多人話賣晒保險都要賠一推錢，唔係好可信。Lotus雖然啲Review好似有啲係假嘅，但就算無咩劣評，而且有個同事之前去都係租呢間，所以就試下啦。
【事後報告】
雖然我哋租嘅係Suzuki Jimny，去到佢upgrade咗我哋架車做Suziki Grand Vitara，拎車還車嘅過程都順利，唯獨係架車有啲問題。問題一係Hand brake有問題，問題二係有一日個電池壞咗，要拎去車房整，耽誤咗少少行程，但始終我哋安排呢個road trip嘅行程唔係太緊密，所以都無影響我哋enjoy冰島呢趟旅程。