唔經唔覺已經係Düsseldorf住咗2年有多, 唔係特別鍾意德國或者呢個城市, 但亦都唔係特別討厭, 咁啱搵到份自己鍾意做嘅工, 其他嘢又不過不失, 住下住下就住咗咁耐。
最近唔知係咪因為多咗國泰有直航機飛嚟呢度, 硬係覺得呢度多咗好多亞洲面孔嘅人。其實Düsseldorf係一個幾適合亞洲人住嘅歐洲城市, 遲下再詳細介紹多啲呢個城市, 不過如來您食唔慣德國嘢, 呢個城市都有好多好味嘅亞洲嘢食! (係好味嘅, 唔係嗰啲歐洲人口味嘅”亞洲食物”!)
Düsseldorf機場小貼士
言歸正傳, 如果大家係喺香港直接飛嚟, 應該都會係Düsseldorf International Airport落機, 呢個機場都算係光猛乾淨安全, 唯一唔係好嘅地方係一般落機入境行去行李區, 勁快就搞掂, 因為一般都唔係特別多Schengen以外嘅機係度, 所以入境都唔會好多人排隊同搞好耐, 而咁快去到行李區唔係咩? 快啲拎完快啲去酒店, 就係唔好…因為佢啲行李次次都要等十世先出嚟!! 次次去完個靚廁, 再咪咪摸摸行去行李區都係要有排等… 另外一樣大家都應該好關心嘅嘢就係有無免費wifi, 有, 但係得30分鐘, 如果您有幾部上到網嘅機可以輪住嚟用, 如果唔係就記住要用得strategic啲啦!
Düsseldorf機場出市區小貼士
好啦, 終於辛辛苦苦等到個行李, 咁而家點樣可以出去市區呢? Düsseldorf個機場都算係咁啦, 其實好近市區, 唔駛話特別買好貴嘅車飛。有機場去市區有2個方法, 1係坐巴士, 1係坐S-bahn, 2樣都會去到火車站, 然後喺個度可以轉車去市內其他地方。
坐巴士
拎完行李跟指示出去搵巴士, 我一般有得揀都係坐721, 可以直接去到火車站。 出咗機場向右手邊行, 盡頭就會見到個巴士站, 巴士每20分鐘嚟一次 (無記錯無變就係逢01, 21, 41分就會走), 大約25分鐘就會由機場到達火車站, 車上一般都有顯示牌, 話您知下個站係邊, 單程飛同日票都可以係車上買, 司機一般都有錢找, 但如果紙幣面額太大就好難講啦。除咗721仲有其他巴士, 但好似都唔係去啲好市中心嘅地方, 有需要就可以再check下。
坐S-bahn/火車
如果唔好彩無得搭巴士或者S-bahn站近啲, 就可以考慮搭S-bahn, 有S1同S11揀, 2架都會去到火車站同會停沿途嘅站。先講S11, S11總站係機場, 跟住指示應該都好易搵到個站, S11一個鐘先有一班, 所以時間夾得啱就先會考慮下, 但上咗車12分鐘就會出到去火車站。S1就麻煩少少, 要先去坐Sky Train, 去到一個火車站, 嗰度除咗S1仲有其他RE同ICE搭 (去其他城市嘅火車), 所以記得搵下自己要去邊個月台上車, RE同ICE應該會再快d, 但啲飛都係貴啲, 所以最抵嘅選擇都係等S1, 每半個鐘就有一班, 都ok啦。S1係開通宵嘅, 如果有事要早去機場而無巴士坐, S1都係個好選擇。搭S-bahn或者Sky Train之前都會有賣飛嘅機同打飛嘅機, 唔打飛俾人捉到就要罰40歐, 扮無辜係未必幫到您嘅, 所以最好就唔好慳呢少少錢啦!
大概分享住咁多先, 有其他問題就係下面留言啦! 🙂