在家千日好！有時有啲嘢真係失去咗先發現佢嘅好處，就好似媽咪係身邊嘅時候就唔覺有咩特別，但當冇咗佢，就發現呢個佢有幾偉大！
1. 媽咪係屋企嘅秘書
自己係外國生活就乜都要自己做，要記得定時定候交租，甚至水費，電費，上網費，電話費…總之全部都要自己嚟，是但唔記得一樣，都真係OMG！
2. 媽咪係屋企嘅大力士
想飲牛奶，想食番個橙，屋企無晒廁紙，洗頭水…全部都要自己去買！呢度少少，果度少少…拎住哂返屋企都咪話唔重！仲要住喺無升降機嘅地方…/.\
3. 媽咪係屋企嘅廚師
今日想食蒸水蛋，聽日想食豉椒排骨…喺屋企，同媽咪講聲就可能有得食！係外國生活，想食就真係想下先！除非自己識煮仲要買到晒需要嘅材料，煮完啲味道都仲可能爭咁啲！有人會話去中國餐館囉，老實講，自己煮可能仲好味！
4. 媽咪係屋企嘅醫師
「嘩！呢排熱氣，煲啲涼茶你飲啦！」個排捱夜多，仲要食埋晒啲薯條pizza，生晒暗瘡就只可以戒下口！諗住搵番個羅漢果煲下羅漢果水飲咩，點知喺亞洲超級市場買啲羅漢果全部都奇奇怪怪咁…
5. 媽咪係屋企嘅清潔姐姐
明明前日先吸完塵，做乜今日咁快有咁多塵！明明諗住外國空氣好啲，應該少啲塵，點知都係要成日清潔！有時夜晚返到屋企攰到傻下傻下，都仲要即刻洗衫，如果唔係之後無衫著！
6. 媽咪係屋企嘅理財策劃師
買下食物，買下油，買下洗衣液…樣樣都係錢，仲要樣樣都係好緊要，自己唔去買都唔知加加埋埋啲嘢都好多錢！以前覺得儲印花儲積分，睇住超市百貨公司有咩減價就去買定啲必需品好師奶，好多時都係啲媽媽級先會做嘅嘢！但自己生活耐咗，漸漸都變得精打細算咗！
7. 媽咪係屋企嘅百科全書
冇電飯煲點煮飯？煮燶嘢點算好？件衫有漬添！除咗Google，相信只有阿媽先可以及時幫到你！
