慕尼黑啤酒節呢個節日每年9月10月都成日聽，但對於呢個全世界最大嘅啤酒節，你又知幾多呢？以下呢幾樣野又知唔知？
1. 啤酒節有幾耐歷史？
啤酒節源自1810年，最初只係慶祝Bavarian國王Ludwig I.同佢妻子Theresie嘅結婚紀念活動之一。本來係賽馬活動，但因太受歡迎，而逐漸變成每年舉行嘅活動，繼而進發成今日嘅啤酒節！
2. 啲啤酒有啲咩特色架？
啤酒節嘅啤酒全部都係係德國慕尼黑釀造，而自16世紀，德國Bavaria（啤酒節所屬嘅州）已經對釀造啤酒有嚴格嘅規條，為咗釀造最純嘅啤酒，喺1516年，Duke William IV訂下只可以用水, 大麥（Barley）,同啤酒花（Hop），所以德國嘅啤酒被譽為世上最好味嘅啤酒！
3. 去到啤酒節有咩牌子嘅啤酒飲呢？
啤酒節嘅啤酒都係喺Bavaria釀製，有以下幾個品牌：Augustiner, Paulaner, Spaten-Franziskaner, Löwenbräu, Hacker-Pschorr, Hofbräu
4. 1杯啤酒有幾大杯？幾多錢？又有幾多卡路里？
啤酒節一杯啤酒一般都係1公升1杯，一個人飲唔晒嘅話，就記得同朋友仔share嗌一杯好啦！1杯啤酒通常都係大概10euro以下，而1杯啤酒嘅卡路里就有500kcal啦！！！好肥呀！！！
5. 啤酒節有啲咩德國傳統嘢食要食呢？
有幾樣嘢食嚟到啤酒節唔可以唔試嘅！德國咸豬手啦，腸仔啦，德國麵包啦…！呢啲都聽得多，但原來德國人仲鍾意係啤酒節食燒雞，隻雞醃到好入味，啲皮再燒到脆卜卜！
6. 啤酒節有咩玩架？
啤酒節其實就好似一個大型嘉年華會，有機動遊戲，有賣嘢食既攤位,當然唔少得飲啤酒嘅帳幕！啤酒節係無入場費嘅，機動遊戲都係玩先要俾錢，所以假如你唔食唔飲唔玩，基本上係可以唔洗錢嘅！
7. 去啤酒節要準備啲乜？
話晒係全球最大嘅啤酒節，每年都好多人慕名而來！所以每逢啤酒節期間，去慕尼黑嘅機票火車飛酒店都會好full同好貴，所以要預早book定同計劃行程，如果唔係就要「出外靠朋友」，如果有係慕尼黑住嘅朋友就唔使咁擔心啦！去啤酒節仲要預咗book定張檯，如果唔係入到去都無位坐，無位坐就無得嗌啤酒啦！想全情投入仲可以著埋Bavaria嘅傳統服裝Dirndl(女)或者Lederhosen(男)，去到啤酒節大把人著，唔使驚得自己一個著！
(Source of picture: wikipedia)